Այն, ինչ պետք է իմանաք COVID-19-ի մասին

Published on 
August 27, 2021

CHLA-What-You-Should-Know-Covid-19-1200x628-02.png

Children’s Hospital Los Angeles հիվանդանոցը գործադրում է ամեն ջանք՝ մեր պացիենտներին, ընտանիքներին և անձնակազմի անդամներին COVID-19-ից պաշտպանելու համար: Մեր փորձագետները մեր խնդրանքով փաստեր ներկայացրեցին, որոնք կօգնեն պատասխանել ծնողների ամենակարևոր հարցերին: Ստորև բերված են տեղեկություններ այս վիրուսի մասին, թե ինչ է արվում դրա հետագա տարածումը կանխելու համար, և ինչպես կարող եք պաշտպանվել վարակի սպառնալիքից:

Որո՞նք են COVID-19-ի ախտանշանները։ 

Հիվանդությունների վերահսկման և կանխարգելման կենտրոնները (CDC) նշում են, որ COVID-19-ի ախտանշաններից են.

  • Ջերմություն կամ դող
  • Հազ
  • Շնչարգելություն կամ դժվարացած շնչառություն
  • Հոգնածություն
  • Մկանների կամ մարմնի ցավեր
  • Գլխացավ
  • Համի կամ հոտի զգացողության կորուստ
  • Կոկորդի ցավ
  • Խցանվածություն կամ քթից արտադրություն
  • Սրտխառնոց կամ փսխում
  • Լուծ

Ինչպե՞ս է տարածվում կորոնավիրուսը

Մարդկանց միջև վիրուսը սովորաբար տարածվում է հազալու և փռշտալու, վարակված անձի հետ անմիջական շփման միջոցով: Ավելի հազվադեպ COVID-19-ը կարող է տարածվել վարակված մակերեսին դիպչելով, այնուհետև բերանի, քթի կամ աչքերի միջոցով, սակայն դա չի համարվում հիվանդության տարածման հիմնական եղանակը:

Ինչպե՞ս կարող են մարդիկ օգնել հիվանդության տարածումը կանխելուն: 

Հիվանդությունների վերահսկման և կանխարգելման կենտրոնները (CDC) խորհուրդ են տալիս.

  • Պատվաստվե՛ք, եթե այդ իրավունքը ունեք:
  • Կրե՛ք դիմակ, երբ այդ հանձնարարականը կա: Ներկայումս, եթե դուք ապրում եք COVID-19-ի փոխանցման բարձր մակարդակ ունեցող տարածքում, ապա կրե՛ք դիմակ այն մարդկանց մոտ, ով ձեր ընտանիքից/անմիջական միջավայրից չեն, անգամ եթե պատվաստված եք: Խորհուրդ է տրվում կրել դիմակ նաև դրսում, եթե գտնվում եք մարդկանց մեծ խմբի մեջ:
  • Պահպանե՛ք ֆիզիկական հեռավորություն (առնվազն վեց ոտնաչափի հեռավորություն այլ մարդկանցից):
  • Խուսափե՛ք մարդկանց կուտակումներից և վատ օդափոխվող տարածքներից:
  • Հաճախ լվացեք ձեր ձեռքերը կամ ախտահանեք դրանք ալկոգելով:
  • Հազալիս և փռշտալիս փակե՛ք քիթը կամ բերանը արմունկով:
  • Մաքրե՛ք և ախտահանե՛ք այն մակերեսները, որոնց մեծ թվով մարդիկ են դիպչում:
  • Ամեն օր հետևեք ձեր ինքնազգացողությանը: Եթե ունեք COVID-19-ի որևէ ախտանշաններ, մնացե՛ք տանը՝ բացառություն անելով միայն վիրուսի ստուգում անցնելու համար:

COVID-19-ը բուժելի՞ է 

Լավագույն բուժումը կանխարգելումն է, ուստի պատվաստվե՛ք, եթե ունեք այդ իրավունքը: Քանի որ COVID-19-ը վիրուսային վարակ է, հակաբիոտիկները չեն օգնում: Մշակվել է այս հիվանդության բուժման մի քանի եղանակ, սակայն դրանց արդյունավետությունը տարբեր է: COVID-19-ի հետևանքով կարող են առաջանալ երկարաժամկետ բարդություններ, և այս ռիսկի նվազեցման բուժումը դեռ հայտնի չէ:

CHLA-ը ստուգո՞ւմ է հիվանդներին ու այցելուներին 

Մեր բուժանձնակազմը հետևում է Լոս Անջելեսի վարչաշրջանի Հանրային առողջապահության դեպարտամենտի բոլոր վերջին ցուցումներին հիվանդների հետ իր բոլոր փոխշփումներում՝ վիրուսի տարածումը կանխելու համար: Հիվանդանոցի բոլոր այցելուները հետազոտվում են՝ COVID-19-ի ախտորոշման, ախտանշանների և COVID-19-ով հիվանդի հետ հաստատված շփման հայտնաբերման նպատակով: Սա վերաբերում է նաև այն ծնողներին, ովքեր մնում են հիվանդանոց ընդունված երեխաների հետ: Յուրաքանչյուրին, ով չի անցնում բանավոր հարցադրումների սկրինինգը, հիվանդանոցի տարածք մուտքն արգելվում է: Հիվանդանոցում գիշերելու համար այցելուները պետք է ներկայացնեն նաև ամբողջապես պատվաստված լինելու ապացույց ԿԱՄ ամեն 72 ժամը մեկ՝ բացասական թեստ կամ վերջին 10-ից 90 օրվա ընթացքում COVID-19 հաստատված վարակի ապացույց: Բացի այդ, CHLA-ի բոլոր հիվանդները, հիվանդանոց ընդունվելուց հետո, անցնում են վիրուսի թեստավորում։ Այդ թվում նաև ապագայում բժշկական պրոցեդուրաներ ունեցող հիվանդների թեստավորումը։ Սեղմե՛ք այստեղ՝ այցելուների համար մեր վերջին ուղեցույցներին ծանոթանալու համար:

Ի՞նչ նշանների դեպքում պետք է դիմել բժշկական օգնության: 

Անմիջապես դիմեք շտապ բժշկական օգնության, եթե ձեզ կամ ձեր երեխայի մոտ առաջացել են.

  • Դժվարացած շնչառություն
  • Կրծքավանդակի չդադարող ցավ կամ սեղմում
  • Հանկարծակի շփոթություն
  • Արթնանալու կամ արթուն մնալու անկարողություն
  • Գունատ, մոխրագույն կամ կապտավուն մաշկ, շրթունքներ կամ եղունգների մակերևույթ՝ կախված մաշկի երանգից:

Եթե կասկածում եք, որ դա COVID-19 վարակ է, ապա զանգահարե՛ք բժշկին կամ շտապ օգնության բաժանմունք և տեղեկացրե՛ք, երբ եք ժամանելու, որպեսզի բուժհաստատությունը կարողանա ապահովել, որ որևէ այլ անձի չվարակեք՝ վիրուսը ունենալու դեպքում։

Արդյո՞ք պետք է դիմակ հագցնեմ իմ փոքրիկին

Ոչ, պետք չէ: Հիվանդությունների վերահսկման և կանխարգելման կենտրոնների, Կալիֆոռնիայի և Լոս Անջելեսի վարչաշրջանի՝ անհրաժեշտության դեպքում կտորե դիմակ կրելու մասին հանձնարարականը չի տարածվում մինչև 2 տարեկան երեխաների վրա: Ինչպես բացատրում է Children’s Hospital Los Angeles հիվանդանոցի վարակաբան, բժիշկ Michael Smit-ը, հիմնական պատճառն այն է, որ փոքր երեխայի մոտ դիմակը կարող է դժվարացնել շնչառությունը: Քանի որ նորածինները/փոքր երեխաները չեն կարող հայտնել իրենց անհանգստության պատճառի մասին կամ ինքնուրույն հանել դիմակը, դա կարող է առաջացնել շնչահեղձության վտանգ:

«Նրանք պարզապես չեն կարողանա հաղորդել, եթե շնչառության խնդիրներ ունենան», - ասում է CHLA-ի վարակիչ հիվանդությունների կանխարգելման և վերահսկման բաժնի գլխավոր բժիշկ դոկտոր Smit-ը: «Մի՛ կարծեք, որ մանկիկին կտորե դիմակ հագցնելով կօգնեք նրան. դա կարող է  երեխայի մոտ շնչահեղձության վտանգ հանդիսանալ»։ Դիմակների մասին լրացուցիչ տեղեկությունների համար սեղմեք այստեղ:

Որտե՞ղ կարելի է գտնել ամենաթարմ տեղեկությունները 

Իրավիճակը, ամենայն հավանականությամբ, կշարունակվի փոխվել, քանի դեռ նոր վիրուսի մասին ավելի շատ տեղեկություններ ու փաստեր են ի հայտ գալիս: Առավել արդիական տեղեկությունների համար այցելեք CDC-ի կայք՝ www.cdc.gov։
 

Սեղմե՛ք այստեղ՝ Children’s Hospital Los Angeles պացիենտների, ծնողների և այցելունելի համար COVID-19-ի մասին տեղեկություններին ծանոթանալու համար: